Bersatu, Berjuang Rebut Hak Sejahtera,

Lawan Kapitalisme Imperialisme!

image

MANUSIA SILVER

dpnspri

MANUSIA SILVER

 

                Tengah hari bolong. Perut lagi kosong. Rokok ada di kantong yang bolong. Dua orang dengan muka kusut belum terbasuh kopi, Bang Tabok lagi ngumpul bersama Bang Jaka Geledek di pos ronda deket perempatan komplek Perumahan Kebon Qori. Sambil ngudut rokok kesukannya, Bang Tabok buka obrolan sama Bang Jaka Geledek.

          “Eh Jaka, gimana kabar loe? Guwa denger-denger loe kemaren menang togel, ye?” kata Bang Tabok membuka percakapan. Bang Jaka Geledek yang ngelamun kaget mendengar pertanyaan Bang Tabok. Dengan muka mayun ia menjawab, “Ah loe denger kabar angin kagak jelas, menang apaan? Kagak tembus Bok. Mleset   satu angka. Kalo tembus, nih hari kita makan enak, Bok.”

          Selihai tangan pencopet, Bang Jaka ngambil sebatang rokok milik Bang Tabok. Yang punya rokok diem aje namun mulutnya menyemburkan sindiran,“Tangan loe lincah juga, bisa ae loe ah.” Bang Tabok ngelirik ke Jaka Geledek. Yang disindir pura-pura kagak dengar dengan mengalihkan pembicaraan, “Bok, guwa lagi bingung nih?”

          “Binggung kenapa loe, Jak?” Bang Tabok tanya balik.

          “Ntu si Markonah Bok, keponakan guwa.”

          Bang Tabok dengerin sambil klepas-klepus. Bang Jaka lanjut bicara, “Loe bayangin aje coba, ntu si Markonah dah lulus sekolah tapi belom dapat pekerjaan. Katanya sudah coba lamar kerjaan kesana kemari tapi belom ada panggilan satu pun.” Bang Jaka nyalain sebatang rokok yang dari tadi belom dibakar.

          “Lha mangnya Markonah dah lulus sekolah? Kayaknya masih kemarenan ntu anak.”

          “Udah Bok, loe nye aje nyang lupa. Setahun nyang lalu lulusnye.”

          “Kopi…Kopi…Kopi.Yang Aus…Yang Aus," suara Don Lego, pedagang kopi keliling, muncul memecah konsentrasi Bang Jaka Geledek, nyang kebetulan belom ngopi seharian.

          “Kopi Go, item jangan diaduk. Loe mau kagak, Bok?” kata Bang Jaka.

          Sambil bercanda Bang Tabok menyahut, "Mau lah kalo ditawarin, jadiin 2 gelas Go. Samain aje nih sama Juragan Empang. “Jadi gimane kelanjutan ceritanye Jak si Markonah?”

          “Nah, guwa kasian ama ntu anak belom dapat panggilan gawe mana sekarang situasi kondisinya sulit begini gara-gara pandemi Covid. Guwa kagak habis mikir, ntu anak gimana makan sehari-harinye”

           “Hooh juga ye, tapi kan orang tuanya masih ada, Jak. Loe jangan ambil pusing semua lah,” sahut Bang Tabok sambil nguyup kopi bikinan Bang Lego.

          “Orang tuanya dah almarhum dodol, masa loe lupa si, Bok. Ntu Markonah sekarang hidup sebatang kara, kadang kalo guwa ada rejeki guwa kasih tapi kan kagak bisa ngandelin dari guwa terus, Bok. Kan loe tau sendiri gaji hansip di perumahan sini Bok, ” curhat Bang Jaka sambil ngeluarin selembar duit lima ribuan buat bayar kopi Don Lego.

          “Kurang nih, muke gile juga loe berdua,” gerutu Don Lego.

          Kata Bang Jaka Geledek,  “Bok, tambahin seribu tuh. Gak ada recehan guwa.”

          “Iye Legooooo, santai aje sih kagak usah ngegas kayak nyang ma siape aje sih loe,” sambar Bang Tabok

          “Yeee, loe nyang kemaren aje belom bayar. Jadi sama nyang kemaren kurang ceban,” gerutu Don Lego.

          “Iyeee woles Gooo," canda Bang Tabok.

 

          Selang kagak lama, tiba-tiba Markonah datang dari arah seberang gerbang komplek sambil lari kebirit-birit kayak dikejar setan ditengah hari bolong.

          “Woooiiii Markonah, kenapa loe? tanya Bang Jaka sambil lompat dari tempat duduknya. Bokongnya seperti tersudut rokok.

          “Wah kenapa nih anak? Bang Tapok ikut penasaran

          Markonah nyang denger suara ncang nya tiba-tiba langsung ngerem mendadak sambil putar haluan ke arah pos ronda tempat ncang nya manggil.

          “Kenapa lo, Ntong? Lari buru-buru kayak ikut lomba lari tujuh belasan. Lha, ini kenapa tangan kaki muka loe warnanya silver semua kayak orang-orangan di lampu merah. Loe mau minum apa, Markonah? Mumpung Don Lego belom kabur nih? Sekalian loe tarik napas dulu deh biar entengan ngomongnye,” cerocos Bang Jaka.

          “Teh es manis Ncang pake gula batu,” kata Markonah sambil tarik napas dalem-dalem. Setelah itu Markonah lanjut berkata, “Begini Ncang, tadi ane lari gara-gara dikejar Satpol PP pas lagi Razia PMKS di depan lampu merah Ramayani. Mana belom dapat duit lagi Ncang.”

           “Apaan tuh PMRS Ntong?” tanya Bang Tabok.

          Bang Jaka menyambar,  “PMKS Boook, kuping loe mang nya kagak kedengeran ape?”

          “Penyandang Masalah Kesejahteraan Sosial Bang, itu lho yang kayak tukang minta-minta, tukang pel mobil, pengamen, pengemis” terang Markonah ke Bang Tabok.

          Bang Jaka Geledek heran, “Haaahhhh, loe sekarang jadi tukang minta-minta Markonah? Malu-maluin aje loe jadi orang. Mang nye ijazah sekolah loe kagak laku ape?”

          “Bukan begitu Ncang," terang Markonah. "Ane juga kagak mau jadi Manusia Silver yang kerjanya saban hari minta-minta dan berharap belas kasih dari orang-orang. Kalo ada kerjaan juga Markonah kagak mau, tapi mau bagaimana Ncang, tiap hari kan kita butuh makan minum. Kita hidup butuh biaya yang kagak sedikit Ncang. Daripada Markonah jadi maling kan lebih parah Ncang, setidaknya ini Halal Ncang hasil jerih payah ane sendiri. Dibanding dengan orang-orang berdasi yang sekarang duduk dikursi empuk yang kantornye di Kebon Kosong, malahan mereka lebih parah. Tak perlu kerja keras tapi kerjanye tiap hari nipu rakyat, nilep uang rakyat. Bikin peraturan malah yang bikin sengsara rakyat”

          Bang Jaka menimpali, “Haduh, bener juga sih omongan loe Ntong”

          “Wooiiii Legooo, itu pesenan Markonah dah jadi belom? Lama bener sih loe buat es teh manis doang, takut kagak dibayar ape loe?”  Bang Tabok tiba-tiba teriak.

          Don Lego menjawab santai, “Iye Bang sebentar, terpesona ane dengerin omongan si Markonah. Emang bener ntu yang diomongin, orang-orang berdasi kagak pernah mikirin nasib dan perut orang kecil kayak kite,” sambil ngaduk-ngaduk teh manis nyang baru dibikin dari tadi.

          “Terus loe saban hari dapat duit berape? Mang cukup apa buat kebutuhan hidup sehari-hari?” tanya Bang Jaka.

          “Ya kagak nentu si Ncang, kadang kalo lagi bagus bisa dapat 100ribu. Kadang cuman 30ribu doang. Itu pun masih itungan kotor Ncang,” jawab Markonah sambil minum es teh manis yang ditunggu dari tadi.

          “Seharian itu loe dapat segitu Ntong? Panas kepanasan hujan kehujanan?”tanya Bang Tabok seolah kagak percaya.

          “Iya Bang, perih kan. Ane juga dah coba kirim lamaran kerja tapi belom ada panggilan satu pun. Ya, ini buat bertahan hidup sementara dulu deh Bang, peduli setan deh orang lain mau ngomong ape yang penting ane kagak nyusahin mereka-mereka semua, ane kagak nyolong,” keluh Markonah.

          “Salut Abang sama loe, tahan banting untuk bertahan hidup. Terkadang memang begitu, kite nyang kecil ini kudu berani berjuang demi mendapatkan sisa-sisa rupiah asal Halal. Ywd, es teh manis nye kagak usah loe bayar,”  kata Don Lego bersimpati.

          Bang Jaka Geledek bertanya, “Trus ini loe pake cat beginian ape kagak ada ngaruhnya sama kulit badan loe?”

          “Ya, terkadang diawal ada rasa panas-panasnya Ncang, ntar kadang muncul bentol-bentol. Gatel banget Ncang,” jawab Markonah.

          Bang Tabok gusar, “Buseettt parah kagak ntu? Abang denger-denger di koran sih kalo ntu cat dipakai dalam jangka waktu panjang bisa kena penyakit mematikan, moga-moga loe cepet dah dapat panggilan kerja biar kagak jadi beginian lagi. Sayang umur loe masih panjang,”

          “Iye Bang,” kata Markonah pasrah.

          Bang Jaka Geledek mencecar Markonah, “Trus loe dapat bantuan kagak dari pemerintah? Harusnya kan macem loe orang kayak gini dapat bantuan dari pemerintah. Bukan malah dikejar-kejar kayak maling ayam.”

          “Boro-boro Ncang, ditenggok sama pemerintah aje kagak,” keluh Markonah.

          “Wah loe kudu coba di depan lampu merah Istana Negara ntuh Ntong, sapa tau Pak Presiden liat aksi loe. Biar Pak Presiden malu kalo ada warga negaranya nyang nyampe susah begini cari makan di negeri sendiri,” saran Bang Tabok.

          Don Lego memuji,“Cakep juga pemikiran loe Bok. Kadang-kadang loe pinter juga”

          “Ya makanya banyak nonton Tivi biar kagak ketinggalan inpormasih up to date kalo kata pembawa berita” sahut Bang Tabok sambil ambil sebatang rokok nyang dia heran tinggal sebatang doang.

          Gak sadar ternyata waktu dah menunjukan sore hari. Markonah lantas pamit undurkan diri buat pulang ke rumah, maklum nanti sore habis Magrhib mau ngaji di musholla samping rumah nya.

          Bang Jaka Geledek dan Don Lego juga cabut bareng Markonah. Tinggal Bang Tabok seorang diri sambil masih pusing cari sisa rokoknya nyang baru sebungkus dibelinya tadi siang sebelom ke pos ronda.

          “Kemana yah ntuh rokok larinye, perasaan gw isep baru dua batang doang.”

          Tiba-tiba Bang Tabok melompat. Kaget denger Togop bunyiin klakson motor.

          "Sialan anak ntu. Mentang-mentang sudah terkenal kagak mau dekat-dekat dengan orang miskin. Kacang lupe sama lanjaran."

          Bang Tabok kembali mencari rokoknya.***